Myndir: Þórdís Erla
1. Þorbjörg Þorvaldsdóttir
Bæjarfulltrúi
Þorbjörg er 36 ára Garðbæingur og bæjarfulltrúi, eiginkona Silju Ýrar S. Leifsdóttur og mamma tveggja skólastúlkna, sex og tíu ára. Hún hefur búið víða, þótt hún sé að mestu uppalin í Garðabæ, og valdi að koma aftur til bæjarins til að ala upp börnin sín. Hún hefur búið á nokkrum stöðum innan bæjarins, meðal annars í Kjarrmóum, Ásbrekku á Álftanesi, Holtsbúð og Þrastarlundi, og síðar í Hrísmóum og nú í Löngumýri.
Þorbjörg hefur sterkar rætur í bænum frá unga aldri. Hún tók þátt í skátastarfi með Vífli, lærði á klarinett í Tónlistarskóla Garðabæjar og gekk í Hofsstaðaskóla. Á unglingsárum æfði hún sund og gekk í Garðaskóla, áður en hún fór í Menntaskólann í Reykjavík og útskrifaðist þaðan af fornmáladeild.
Hún er málfræðingur að mennt, með BA í almennum málvísindum frá Háskóla Íslands og MA í málvísindum frá Leiden University í Hollandi. Hún er einnig íslenskukennari og hefur lokið viðbótardiplómu til kennsluréttinda. Þorbjörg starfaði nýlega sem samskipta- og kynningarstjóri Samtakanna ‘78, en hefur áður gegnt fjölbreyttum störfum, meðal annars sem umsjónarkennari, doktorsnemi, flugfreyja, við aðhlynningu, sem barþjónn og í gestamóttöku á hóteli.
Hún hefur alla tíð verið virk í félagsstörfum og sat m.a. í stjórn Samtakanna ‘78 á árunum 2018–2022, þar af þrjú ár sem formaður. Hún hefur mikinn áhuga á samfélagsmálum, mannréttindum og velferð, auk þess að hafa áhuga á bókmenntum, poppmenningu og alþjóðastjórnmálum.
Þorbjörg hefur setið í bæjarstjórn og bæjarráði á kjörtímabilinu og er jafnframt nefndarmaður í velferðarráði. Helstu áherslur hennar snúa að fjölbreyttum, öruggum og loftslagsvænum samgöngum, húsnæðisuppbyggingu fyrir alla hópa – sérstaklega ungt fólk og tekjulægri – og að Garðabær sýni samfélagslega ábyrgð í velferðarþjónustu. Hún lítur á bæinn sem stað fullan af tækifærum og vill að þau verði nýtt: „Það eru svo mörg spennandi tækifæri fyrir hendi í Garðabæ, við verðum að grípa þau!“
2. Guðjón Pétur Lýðsson
Atvinnurekandi
Guðjón Pétur Lýðsson er 38 ára og menntaður húsasmiður, með bakgrunn úr Fjölbraut í Garðabæ og Iðnskólanum í Reykjavík. Hann þekkir bæinn vel og hefur skýrar hugmyndir um hvernig hann eigi að þróast.
Hann leggur áherslu á málefni eldri borgara og ungra barnafjölskyldna og vill sjá bæinn byggjast upp á manneskjulegan hátt. Guðjón styður fjölbreytt búsetuform þar sem kynslóðir geta búið saman og leggur áherslu á lágreista byggð sem passar vel inn í umhverfið. Honum finnst mikilvægt að hverfi þróist í góðu samræmi, frekar en með miklum andstæðum, svo samfélagið verði tengt og heildstætt.
Guðjón er einn af stofnmeðlimum Garðabæjarlistans og í frítíma sínum er hann mjög virkur í félags- og sjálfboðastarfi og hefur komið víða við. Hann sat í stjórn Ungmennafélags Álftaness í fimm ár, hefur tekið þátt í starfi Ferðamálasamtaka Vestmannaeyja og Leikmannasamtaka Íslands og sinnt þar hagsmunagæslu fyrir íþróttafólk. Hann hefur einnig verið bekkjarfulltrúi í Hofstaðaskóla og er félagi í Oddfellow, þar sem lögð er áhersla á að styðja góð málefni. Fjölskyldan er í forgrunni – og eins og hann segir sjálfur, þá virðist hann eingöngu geta búið til stráka, en sá fjórði er væntanlegur á næstunni.
3. Joanna Marcinkowska
Verkefnastjóri inngildingar
Joanna Marcinkowska er 49 ára með fjölbreyttan bakgrunn í námi og starfi, bæði hér á landi og erlendis. Hún er menntuð í viðskiptafræði frá Háskólanum í Toruń í Póllandi, hefur lagt stund á íslensku sem annað mál við Háskóla Íslands og bætt við sig sérhæfingu í verkefnastjórnun og jafnréttisfræðum. Í dag starfar hún við Háskóla Íslands þar sem hún leiðir verkefni um inngildingu í íslensku háskólasamfélagi.
Starfsferill Joönnu hefur að stórum hluta snúist um málefni innflytjenda, mannréttindi og inngildingu. Hún hefur gegnt fjölbreyttum verkefnastjórastörfum hjá Reykjavíkurborg og í félagsmálaráðuneytinu, þar sem hún kom meðal annars að uppbyggingu og rekstri þjónustu fyrir innflytjendur. Samhliða starfi hefur hún verið virk í öflugu félagsstarfi og setið í stjórnum fjölmargra félagasamtaka sem tengjast jafnrétti, kvenréttindum og fjölbreytileika.
Hjartað liggur í því að byggja upp samfélag þar sem allir fá að tilheyra. Joanna leggur áherslu á inngildingu, virðingu og raunveruleg tækifæri til þátttöku, og vill sjá bæ þar sem enginn stendur fyrir utan og allir skipta máli.
Í frítímanum sækir hún orku út í náttúruna – á skíðum, í fjallgöngum eða einfaldlega utandyra. Hún nýtur líka rólegra stunda heima með bók, prjónana og fjölskyldunni. Hún á sterkar rætur í Póllandi, þar sem hún ólst upp, og hefur gaman af því að ferðast, sérstaklega í góðum félagsskap. Og svo hefur hún skemmtilega sérvisku: hún hefur óvenju mikinn áhuga á að lesa lyfjaleiðbeiningar.
4. Finnur Jónsson
Umsjónarkennari
Finnur Jónsson er 34 ára kennari og tómstunda- og félagsmálafræðingur. Hann starfar sem umsjónarkennari yngri barna í Urriðaholtsskóla og hefur í gegnum tíðina unnið fjölbreytt störf með börnum og ungmennum. Hann hefur verið virkur í starfi Garðabæjarlistans frá árinu 2022, er formaður listans og situr sem aðalfulltrúi í leikskólanefnd.
Finnur brennur fyrir málefnum barna og fjölskyldna og vill sjá Garðabæ sem sterkt, fjölskylduvænt samfélag þar sem börn fá að njóta sín. Hann leggur áherslu á góða grunnþjónustu og að öll börn hafi jöfn tækifæri, óháð aðstæðum, með barnvæna og réttindamiðaða nálgun að leiðarljósi.
Finnur er fæddur og uppalinn í Garðabæ og býr í dag í Urriðaholti með fjölskyldu sinni. Hann á íþróttabakgrunn úr handbolta með Stjörnunni, þar sem hann lék með meistaraflokki, en undanfarin ár hefur hann tekið hlaup föstum tökum – bæði á götum og uppi í fjöllum.
5. Baldur Ó. Svavarsson
Arkitekt
Baldur Ó. Svavarsson er 69 ára arkitekt, menntaður frá Arkitektaháskólanum í Ósló, og rekur eigin stofu, Úti og Inni s.f. Hann hefur lengi verið virkur í félagslífi Garðabæjar og lagt sitt af mörkum á ýmsum vettvangi, meðal annars sem fyrrverandi formaður handknattleiksdeildar Stjörnunnar. Í dag situr hann í stjórn Rotaryklúbbsins Görðum, Norræna félagsins í Garðabæ og Sögufélags Garðabæjar.
Í sveitarstjórnarmálum hefur Baldur sérstakan áhuga á skipulagsmálum, menningu og skólastarfi, enda telur hann þessa þætti skipta miklu máli fyrir þróun og lífsgæði í bænum.
Áhugamálin tengjast bæði starfi og lífsstíl; arkitektúrinn á stóran sess, en einnig allt sem viðkemur Stjörnunni. Hann hefur sjálfur verið virkur íþróttamaður og lék með handknattleiksliði félagsins í þremur efstu deildum landsins. Auk þess á hann leiki með meistaraflokki í knattspyrnu. Í frítímanum nýtur hann þess að fara í stangveiði og á skíði. Baldur hefur búið í Garðabæ alla tíð, þó hann sé fæddur í Vestmannaeyjum.
6. Harpa Grétarsdóttir
Verkefnastjóri
7. Maru Aleman
Ferðamálaráðgjafi og formaður W.O.M.E.N. in Iceland
Maru E. Alemán er 43 ára og með MBA gráðu í Hospitality Management frá Sviss, auk sérhæfingar í tekjustýringu frá Cornell University. Hún hefur yfir 20 ára reynslu í ferðaþjónustu, bæði í rekstri og stefnumótun, og hefur meðal annars starfað sem tekjustjóri fyrir hótel á Íslandi. Í dag starfar hún sem sjálfstæður ráðgjafi þar sem hún aðstoðar fyrirtæki við tekjustýringu, dreifingu og stafrænar lausnir.
Hún er jafnframt stjórnarformaður W.O.M.E.N – samtaka kvenna af erlendum uppruna á Íslandi og hefur tekið þátt í starfi Velferðarvaktar Reykjavíkurborgar, þar sem hún hefur fengið dýrmæta innsýn í velferðarmál og geðheilsu.
Maru leggur áherslu á að byggja samfélag þar sem fólk upplifir öryggi, aðgengi og raunverulega þátttöku. Henni eru velferðarmál, geðheilsa og stuðningur við fjölskyldur sérstaklega hugleikin, ásamt því að bæta aðlögun og þátttöku fólks af erlendum uppruna. Hún vill að þjónusta sveitarfélagsins sé mannleg, aðgengileg og taki mið af ólíkum þörfum fólks.
Í frítímanum hefur hún mikinn áhuga á ferðalögum, menningu og matargerð, og nýtur þess að tengja saman fólk og hugmyndir úr ólíkum áttum. Hún hefur líka brennandi áhuga á þróun ferðaþjónustu og því hvernig má bæta upplifun fólks með einföldum og snjöllum lausnum.
8. Hannes Ingi Geirsson
Íþróttakennari
Hannes Geirsson er 48 ára íþróttafræðingur með meistaragráðu í mannauðsstjórnun og vinnusálfræði. Hann starfar sem íþrótta- og sundkennari við Flataskóla, þar sem hann fær að sameina þekkingu sína og áhuga á hreyfingu og vellíðan barna og unglinga.
Hjartað liggur í íþrótta-, tómstunda- og skólamálum, og hann leggur áherslu á að börn og ungmenni hafi góð og fjölbreytt tækifæri til að hreyfa sig, þroskast og hafa gaman – bæði í íþróttum og skólastarfi.
Í frítímanum er Hannes sjaldan kyrr; hann er annað hvort úti í náttúrunni eða á íþróttavellinum. Hann er margfaldur Íslandsmeistari í blaki með Stjörnunni og kann vel að meta bæði liðsheild og keppnisskap – gildi sem fylgja honum jafnt innan vallar sem utan.
9. Sveinbjörg Vilhjálmsdóttir
Fv. tónlistarskólastjóri
Sveinbjörg Vilhjálmsdóttir hefur áratugalanga reynslu af tónlist, kennslu og menningarstarfi. Hún er píanóleikari og fyrrverandi tónlistarskólastjóri með fjölbreyttan námsbakgrunn frá Íslandi, Englandi og Bandaríkjunum. Hún lauk meðal annars píanóeinleikara- og söngkennaraprófi frá Guildhall School of Music and Drama í London og stundaði framhaldsnám við Westminster Choir College í Princeton í Bandaríkjunum. Þá hefur hún einnig lokið tónmenntakennaraprófi frá Tónlistarskólanum í Reykjavík og námi við Leiðsöguskóla Íslands. Sveinbjörg kenndi um árabil við ýmsa tónlistarskóla, bæði hérlendis og erlendis, og var fyrsti og síðasti skólastjóri Tónlistarskóla Álftaness frá 1987 til 2013. Hún hefur komið fram á fjölda tónleika sem meðleikari og í kammerhópum og starfaði einnig um tíma sem leiðsögumaður. Hún hefur alla tíð verið virk í félags- og samfélagsmálum. Sveinbjörg var meðal stofnenda Hagsmunasamtaka Bessastaðahrepps árið 1986 og tók þátt í starfi listafélagsins Dægradvalar á Álftanesi. Hún hefur einnig starfað með Garðabæjarlistanum frá upphafi og setið í ýmsum nefndum á vegum bæjarins, meðal annars í umhverfisnefnd, menningarnefnd, tónlistarskólanefnd og öldungaráði.
Í sveitarstjórnarmálum leggur Sveinbjörg áherslu á jöfnuð, umhverfis- og loftslagsmál, menningu og vandaða byggðaþróun. Henni eru heiðarleiki, bjartsýni, náttúruvernd og velferð barna, dýra og þeirra sem minna mega sín sérstaklega hugleikin. Tónlist og listir skipa stóran sess í lífi hennar, ásamt lestri, útivist, ferðalögum og góðum mat. Fjölskyldan er henni þó kærust; hún er gift John A. Speight, tónskáldi og fyrrverandi söngvara, og eiga þau tvo syni og átta barnabörn.
10. Askur Hrafn Hannesson
Frístundaleiðbeinandi og háskólanemi
11. Guðrún Elín Herbertsdóttir
Viðskiptafræðingur
Guðrún Elín Herbertsdóttir er 48 ára viðskiptafræðingur með BS gráðu frá HR og hefur starfað sem sérfræðingur hjá Seðlabanka Íslands frá árinu 2006. Hún hefur einnig víðtæka reynslu úr sveitarstjórnarmálum, sat sem bæjarfulltrúi í Garðabæ á árunum 2014–2018 og var oddviti Bjartrar framtíðar á sama tíma. Þá átti hún sæti í bæjarráði og umhverfisnefnd og hefur síðan verið varamaður í umhverfisnefnd.
Guðrún leggur mikla áherslu á umhverfismál og vill vernda náttúruna í bænum og fjölga grænum svæðum. Hún vill einnig bæta göngustíga til að gera bæinn aðgengilegri og hvetjandi fyrir útivist. Þá vill hún létta álögum af barnafjölskyldum, hækka hvatapeninga og styrkja þjónustu við eldra fólk.
Hún hefur skýra sýn á bæ þar sem jafnvægi ríkir milli uppbyggingar og náttúru, og þar sem þjónusta við íbúa er bæði sterk og aðgengileg.
12. Tómas Þór Jacobsen
Tómstunda- og félagsmálafræðingur og forstöðumaður
Tómas Þór Jacobsen er 33 ára og menntaður í tómstunda- og félagsmálafræði, auk þess að hafa lokið MT gráðu í kennslufræðum. Hann hefur starfað sem forstöðumaður félagsmiðstöðvar og umsjónarmaður ungmennaráðs Garðabæjar frá árinu 2018, þar sem hann hefur unnið náið með ungmennum og tekið virkan þátt í að efla rödd þeirra og þátttöku í samfélaginu.
Í sveitarstjórnarmálum leggur Tómas sérstaka áherslu á jafnrétti fyrir öll og vill stuðla að samfélagi þar sem allir hafa jöfn tækifæri til þátttöku og áhrifa. Í frítímanum hefur hann mikla ánægju af hlaupum og nýtur þess að vera á hreyfingu.
13. Ása Steinarsdóttir
Ferðaljósmyndari
14. Axel Jónsson
Matreiðslumaður og leiðbeinandi á leikskóla
Axel Ingi Jónsson er 36 ára, giftur og tveggja barna faðir. Hann er frá Eskifirði en hefur komið sér vel fyrir í Garðabæ, þar sem hann og fjölskylda hans hafa fest rætur. Hann er menntaður matreiðslumaður og starfaði við fagið í mörg ár, bæði hér heima og erlendis.
Í dag starfar Axel sem leiðbeinandi á leikskóla, þar sem hann vinnur náið með börnum og leggur áherslu á að skapa hlýtt, öruggt og kærleiksríkt umhverfi. Hann hefur sérstakan metnað fyrir því að vinna með börnum með fjölþættan vanda og leggja sitt af mörkum til að styðja þau og efla.
Í sveitarstjórnarmálum leggur Axel megináherslu á málefni barna og ungmenna og lýðheilsu. Hann vill styrkja leik- og grunnskóla, bæta aðgengi að íþróttum fyrir alla og efla menningarlíf í bænum, enda telur hann þessa þætti skipta sköpum fyrir velferð og lífsgæði íbúa.
Frítíminn snýst að miklu leyti um íþróttir; hann leggur stund á hnefaleika, sinnir dómgæslu í íþróttinni og situr í stjórn Hnefaleikafélags Kópavogs. Hann hefur einnig mikinn áhuga á knattspyrnu og nýtur þess að fylgjast með syni sínum æfa með Stjörnunni. Hann nýtur samveru með fjölskyldunni og hefur sérstaklega gaman af að elda fyrir þau góðan mat. Tónlistin á líka sinn sess; hann leikur á nokkur hljóðfæri, var lengi í hljómsveit, hefur gefið út hljómplötur og komið fram á tónleikum víða um Evrópu.
15. Signý Hlíf Árnadóttir
Náms- og starfsráðgjafi
16. Stefán Daníel Jónsson
Lögfræðingur
Stefán Daníel Jónsson er 37 ára og menntaður í lögfræði og alþjóðasamskiptum frá Háskóla Íslands. Hann starfar hjá félags- og húsnæðismálaráðuneytinu og hefur þar öðlast góða innsýn í málaflokka sem snerta daglegt líf fólks.
Í sveitarstjórnarmálum leggur Stefán áherslu á samgöngur, þar sem hann vill sjá fjölbreytta valkosti fyrir íbúa – allt frá bættri aðstöðu fyrir gangandi og hjólandi til uppbyggingar Borgarlínu. Einnig brennur hann fyrir íþrótta- og æskulýðsstarfi barna og ungmenna og telur mikilvægt að aðgengi sé raunhæft fyrir alla, óháð kostnaði. Þá vill hann stuðla að fjölbreyttu húsnæði svo fleiri, sérstaklega yngra fólk og fyrstu kaupendur, geti fest rætur í bænum.
Í frítímanum snýst mikið um íþróttir, sérstaklega knattspyrnu, og fylgist hann vel með Stjörnunni og KFG. Hann hefur einnig fjölbreyttan bakgrunn; aðeins hluti ættar hans er íslenskur, en móðir hans er frá Englandi og amma hans frá Danmörku.
17. Svanhvít Sigurjónsdóttir
Lífupplýsingafræðingur
Svanhvít Sigurjónsdóttir er 36 ára lífupplýsingafræðingur og starfar sem verkefnastjóri. Hún hefur áhuga á fólki og samfélagi og leggur áherslu á að skapa umhverfi þar sem fjölskyldur geta dafnað.
Í sveitarstjórnarmálum vill Svanhvít styðja vel við fjölskyldur og tryggja að bæði börn og fullorðnir hafi aðgang að fjölbreyttu úrvali tómstunda og íþrótta. Hún leggur einnig áherslu á að byggt sé fjölbreytt húsnæði, sérstaklega með ungt fólk í huga, og telur mikilvægt að í Garðabæ búi fjölbreyttur hópur fólks – bæði hvað varðar aldur og ólíkar fjölskyldugerðir.
Í frítímanum nýtur hún þess að lesa og fara í göngutúra við ströndina á Álftanesi. Hún er líka að læra á píanó á fullorðinsárum, sem hún hefur gaman af að takast á við. Þótt hún hafi ekki alist upp í Garðabæ á hún sterkar rætur í Garðabæ í gegnum fjölskyldu og vini, og ber hlýjan hug til bæjarins.
18. Björn Gústav Jónsson
Háskólanemi
19. Kristín Helga Gunnarsdóttir
Rithöfundur
20. Óli Valur Ómarsson
Knattspyrnumaður
21. Brynja Guðmundsdóttir
Viðskiptafræðingur
22. Þorvaldur Þorsteinsson
Viðskiptafræðingur
Þorvaldur Þorsteinsson er 62 ára viðskiptafræðingur með langa reynslu úr atvinnulífinu, meðal annars er hann fyrrverandi framkvæmdastjóri Golfklúbbsins Odds. Hann hefur alltaf haft áhuga á uppbyggingu og góðu skipulagi, og vill sjá samfélag þar sem fólki líður vel og hefur tækifæri til að blómstra.
Í sveitarstjórnarmálum leggur hann áherslu á lýðheilsu og sterkt, manneskjulegt samfélag þar sem lífsgæði eru í forgrunni.
Í frítímanum nýtur hann þess að hreyfa sig, sérstaklega í golfi, og telur reglulega hreyfingu lykilinn að góðri líðan.
