Velkomin í betri Garðabæ
Samfélag sem virkar
Gott skipulag styður við og bætir lífsgæði íbúa. Áhrif skipulags á daglegt líf fólks verða alltaf að vera í öndvegi. Garðabær er ríkur af náttúruperlum og býður upp á fjölbreytt tækifæri til útivistar. Þetta er ein mesta sérstaða sveitarfélagsins og um hana eigum við að standa vörð.
Það er yndislegt að búa í Garðabæ og við eigum öll að hafa tækifæri til þess að koma þaki yfir höfuðið í heimabænum okkar. Garðbæingar eru fjölbreyttur hópur fólks með mismunandi þarfir og fjárráð. Allt of lengi hefur það verið lenska að ungt fólk eða tekjulægra flytji úr bænum þar til hagurinn hefur vænkast, með þeim afleiðingum að við missum fjölda fólks úr samfélaginu okkar til nærliggjandi sveitarfélaga. Garðabæjarlistinn vill að allar kynslóðir Garðbæinga eigi að geta búið saman í Garðabæ. Til þess þarf Garðabær alltaf að huga að alvöru fjölbreytni í húsnæðisuppbyggingu.
Garðabær hefur lengi verið eftirbátur nágrannasveitarfélaga í uppbyggingu félagslegs húsnæðis. Það er að mati Garðabæjarlistans óásættanlegt fyrir sveitarfélag sem telur 21 þúsund manns að geta ekki boðið húsnæði fyrir þau sem það þurfa, enda er ljóst að þörfin er til staðar. Garðbæingar sem lenda í áföllum eða þurfa aðstoð eiga að geta búið áfram í Garðabæ. Það er kominn tími til að Garðabær axli samfélagslega ábyrgð í málaflokknum.
Við viljum
- Auka framboð á fjölbreyttum húsnæðiskostum fyrir fólk á öllum aldri og í öllum tekjuhópum.
- Auka gæði og fjölbreytni grænna svæða til útivistar og heilsuræktar.
- Bera virðingu fyrir bæði friðlýstum og óröskuðum svæðum innan Garðabæjar og gæta þess að raska vistkerfum sem minnst í uppbyggingu og framkvæmdum.
- Horfa til almannaréttar þegar kemur að aðgengi fólks að fjörum, vatns- og árbökkum.
- Auka aðgengi fólks að grænum svæðum.
- Hafa umhverfisgæði (loftgæði og hljóðvist) alltaf í huga við uppbyggingu.
- Aðgreina skólp frá öðrum fráveitumannvirkjum og nýta sjálfbærar ofanvatnslausnir eins og hægt er.
- Gera ráð fyrir að almenna daglega þjónustu sé hægt að sækja fótgangandi innan 15 mínútna.
- Gera ráð fyrir því að græn svæði eða náttúruminjar verði innan 5-8 mínútna göngufæris fyrir alla íbúa.
- Hafa mjög skýr viðmið um gæði nýs íbúðarhúsnæðis með tilliti til birtuskilyrða í íbúðum, útlits og aðgengi að grænum svæðum og leikvöllum.
- Tryggja að í Garðabæ verði aukið framboð af leigu- og kaupleiguíbúðum sem henta bæði einstaklingum og fjölskyldum, námsmönnum og eldra fólki.
- Taka þátt í ábyrgri uppbyggingu félagslegs húsnæðis á höfuðborgarsvæðinu.
- Gæta að því í uppbyggingu að framboð verði einnig af lóðum til einstaklinga og lóðum verði úthlutað á sanngjarnan hátt.
Við ætlum að
- Skipuleggja blandaða byggð í Iðnbúð, Smiðsbúð og Gilsbúð með áherslu á smærri íbúðir og atvinnuhúsnæði á neðstu hæð.
- Skipuleggja lágreista íbúabyggð og metnaðarfullt almennings- og leiksvæði á Hofsstaðavelli.
- Gera malbikaðan útivistarstíg í kringum Arnarnesið og tengistíg meðfram Hraunholtslæk neðan við Flatir.
- Færa knattspyrnu, handknattleik og körfuknattleik hjá Stjörnunni á Miðgarðssvæðið samhliða fyrirhugaðri uppbyggingu íþróttamannvirkja á svæðinu.
- Skipuleggja tvo heila gervigrasvelli á Álftanesi og taka frá svæði fyrir hálft knatthús
- Taka frá lóðir fyrir óhagnaðardrifin leigufélög og búseturéttarfélög í öllum nýjum hverfum og tryggja stofnframlag.
- Gera lítið notaðar grasflatir að gæða grænum svæðum með fjölbreyttum gróðri.
- Setja upp trálimgerði og náttúruvænar varnir við umferðargötur nálægt byggð gegn efnamengun og hljóðmengun.
- Kaupa fleiri félagslegar íbúðir á hverju ári og stytta biðlista.
Samgöngur eru bestar þegar við tökum ekki eftir þeim: Þegar við komumst á þægilegan og öruggan hátt þangað sem við viljum fara, sama hvaða ferðamáta við notum. Við eigum að geta sent börnin okkar áhyggjulaus af stað í skóla eða tómstundir milli hverfa bæjarins okkar og sjálf verið örugg hvort sem við erum gangandi, hjólandi, á vespu, rafskútu eða bíl.
Garðabæjarlistinn vill að íbúar bæjarins hafi raunverulegt val um það hvernig þeir komast á milli staða og að fólk hafi tækifæri til þess að efla eigin heilsu og vinna gegn loftslagsbreytingum og mengun með því að nýta virka ferðamáta. Til þess að það verði raunhæfur kostur þarf Garðabær að forgangsraða í þágu fjölbreyttra samgangna. Svo við komumst öll leiðar okkar og aftur heim.
Við viljum
- Leggja þunga áherslu á öryggi fólks á ferð, óháð ferðamáta.
- Gera breytingar þannig að þægilegt sé að ganga um bæinn, að gangstéttar séu aðgengilegar, nægilega breiðar og hreinlega til staðar.
- Gera kröfu um að aðgengismál fatlaðs fólks og gangandi vegfarenda verði höfð í huga við allar framkvæmdir.
- Leggja meiri áherslu á vistvæna og virka samgöngumáta (gangandi, hjólandi, almenningssamgöngur, rafskútur o.fl.) og huga að samræmingu og samtengingu þar á milli.
- Ýta undir deilihagkerfi og örflæði, þ.e. deilibíla, deilihjól, deilirafskútur o.þ.h.
- Metnaðarfulla uppbyggingu innviða þannig að íbúar hafi raunverulegt val um ferðamáta.
- Að þarfir gangandi vegfarenda séu settar framar í forgangsröðina en verið hefur við snjómokstur.
Við ætlum að
- Gera stórátak í uppbyggingu og viðhaldi gangstétta.
- Setja upp örugga og yfirbyggða geymslustaði fyrir hjól, rafhjól og rafmagnshlaupahjól við skóla og íþróttamannvirki.
- Uppfæra bílakost bæjarins í rafmagn.
- Bjóða starfsfólki Garðabæjar upp á samgöngustyrk.
- Setja upp stöðvar fyrir deilirafskútur á völdum stöðum í bænum.
- Gera nýja og metnaðarfulla umferðaröryggisáætlun fyrir Garðabæ.
- Fylgja eftir fyrirhugaðri lækkun hámarkshraða á götum innanbæjar.
- Gera strætó gjaldfrjálsan fyrir börn á aldrinum 12-16 ára.
Ábyrg fjármál eru undirstaða sjálfbærrar og réttlátar samfélagsþróunar, þar sem fjármagn er nýtt með markvissum hætti til að mæta raunverulegum þörfum íbúa. Fjárhagsáætlarnir eiga að endurspegla skýra sýn á forgangsröðun, jöfnuð og langtímahugsun í uppbyggingu samfélagsins. Með gagnsæi, vandaðri greiningu og ábyrgri ákvörðunartöku tryggjum við að fjármunir bæjarins styrki bæði þjónustu, innviði og lífsgæði allra íbúa.
Við viljum
- Forgangsraða fjármagni með það markmið að jafna stöðu íbúa og draga úr ójöfnuði
- Lækka þjónustugjöld eins og unnt er
- Forgangsraða verkefnum í þágu barnafjölskyldna
- Innleiða jafnréttisskimun í fjárhagsáætlunargerð og fyrir stærri útgjöld
- Greina fjármál bæjarins út frá því hvaða hópar njóta góðs af opinberum fjárfestingum
- Fjárfesta í innviðum og gæta þess að þeir fylgi íbúaþróun
- Leita leiða til að Garðabær fái réttmætt hlutfall skatttekna af fjármagnstekjuskatti
- Þrýsta á ríkið að koma til móts við bæinn vegna grunnþjónustu
- Hefja samtal við ríkið um sanngjarnara fyrirkomulag fasteignamats
Við ætlum að
- Tengja fjárhagsáætlanagerð betur við raunveruleg félagsleg markmið bæjarins
- Nota jafnréttisskimun og áhrifamat til að bæta forgangsröðun
- Setja gagnsæjar upplýsingar fram um það hvert fjármagnið fer og hvaða hópar njóta þess
- Verja fjármunum í verkefni sem styrkja grunnþjónustu, innviði og jöfnuð til lengri tíma
- Beita sveitarfélaginu af festu gagnvart ríkinu þegar ósanngjarn kostnaður fellur á bæinn
Það eykur lífsgæði að geta unnið nálægt heimili sínu. Garðabær á ekki bara að vera góður staður til að búa á, heldur einnig öflugt samfélag til að starfa, skapa og byggja upp atvinnu. Garðabæjarlistinn vill fjölbreytt atvinnulíf sem styrkir bæjarfélagið, dregur úr þörf fyrir langar ferðir til og frá vinnu og skapar fleiri tækifæri fyrir íbúa og fyrirtæki í bænum.
Við viljum
- Fjölbreyttara atvinnulíf í Garðabæ og fleiri störf nær heimilum fólks
- Styðja við ný fyrirtæki í Garðabæ með hagkvæmri starfsaðstöðu, ráðgjöf, tengingu við styrki og stuðningi
- Hentugt húsnæði og góða vinnuaðstöðu fyrir einyrkja, frumkvöðla og smærri fyrirtæki
- Aukin tækifæri til fjarvinnu; samvinnurými og sveigjanlegar starfsstöðvar í bænum
- Betri tengingu milli skipulags, samgangna og atvinnusvæða svo auðveldara sé að sækja vinnu
- Skýrari stuðning við nýsköpun, skapandi greinar og græn störf
- Vernda skipulagt atvinnuhúsnæði og þróa það áfram sem grunn að öflugu atvinnulífi í bænum
Við ætlum að
- Finna og þróa húsnæði í bænum sem hentar einyrkjum, frumkvöðlum og smærri fyrirtækjum
- Veita nýjum fyrirtækjum skýrar upplýsingar og leiðsögn um leyfi, ferla og möguleika innan kerfisins
- Vinna markvisst að því að atvinnulóðum og atvinnuhúsnæði verði ekki breytt í íbúðarhúsnæði nema skýrir hagsmunir bæjarins mæli með því
- Skoða uppbyggingu samvinnurýmis eða vinnumiðstöðvar fyrir fólk í óstaðbundnum störfum og sjálfstætt starfandi fólk
- Eiga reglulegt samráð við atvinnulífið í Garðabæ um þróun atvinnusvæða, húsnæðisþarfir og innviði
- Styðja við uppbyggingu atvinnusvæða sem taka mið af loftslagsmarkmiðum, góðu aðgengi og vönduðu nærumhverfi
Öflugt lýðræði og fagleg stjórnsýsla eru grunnur að traustu samfélagi. Þegar íbúar hafa raunveruleg áhrif og ákvarðanir byggjast á þekkingu og greiningu, verður þjónustan betri og traust eykst.
Við viljum
- Auka raunverulega þátttöku íbúa í ákvörðunartöku
- virkara samtal bæjarins við fyrirtæki, sjálfstætt starfandi fólk og frumkvöðla um þarfir og tækifæri í atvinnumálum
- Byggja upp sterka og faglega stjórnsýslu innan bæjarins
- Draga úr óþarfa aðkeyptri þjónustu og efla innri þekkingu
- Tryggja að ákvarðanir byggist á greiningu á þörfum íbúa
- Auka gagnsæi og aðgengi að upplýsingum
- Skapa vettvang þar sem fjölbreyttar raddir fá að heyrast
- Að starfsfólk Garðabæjar endurspegli fjölbreytileika íbúa og hafi þekkingu og skilning á ólíkum þörfum þeirra
Við ætlum að
- Fjölga sérfræðingum innan stjórnsýslunnar og efla faglega þekkingu
- Innleiða reglulega greiningu á þörfum íbúa og rekstraraðila (kannanir, gögn, samtal)
- Stofna íbúaráð í hverfum Garðabær
- Tryggja fjölbreytta þátttöku í íbúaráðum
- Setja upp og þróa stafræna samráðsgátt
- Gera upplýsingar og samráð aðgengilegt á fleiri tungumálum
- Tengja niðurstöður samráðs og íbúaráða beint við ákvarðanatöku
- Setja skýr markmið um fjölbreytileika í ráðningum og fylgja þeim eftir
- Koma á skýru og gagnsæju verklagi við móttöku og svörun erinda frá almenningi
Samfélag sem styður
Garðabæjarlistinn vill að Garðabær sé samfélag þar sem ólíkt fólk tekur þátt á eigin forsendum og upplifir að það eigi hér heima. Gott samfélag byggir á því að við getum öll blómstrað.
Við viljum
- Skýra mannréttinda- og inngildingarstefnu með mælanlegum markmiðum
- Að íbúar upplifi raunverulega að þau tilheyri í bænum
- Samráð við íbúa sem endurspeglar fjölbreytileika bæjarins
- Styrkja samfélagsrými, viðburði og verkefni sem byggja brýr á milli fólks
- Virða mannréttindi fatlaðs fólks samkvæmt samningi Sameinuðu þjóðanna
- Aðgengi í víðum skilningi sem leiðarljós í skipulagi, þjónustu og upplýsingagjöf
- Móttöku- og tengslakerfi fyrir nýja íbúa
- Aukinn stuðning fyrir skóla, frístundastarf og íþróttafélög til að efla inngildandi starfshætti
- Fræðslu um kynjafræði, hinsegin málefni, fötlunarfordóma, kynþáttafordóma, fjölmenningarnæmni og inngildandi samskipti sem hluta af faglegri þróun starfsfólks
- Skapa samveruvettvang eða vísi að hinsegin félagsmiðstöð fyrir ungmenni
Við ætlum að
- Setja stefnu, verklag og ábyrgð jafnréttismála skýrar fram í stjórnsýslu bæjarins
- Ráða jafnréttisfulltrúa Garðabæjar
- Byggja upp reglulega fræðslu, samráð og eftirfylgni í stað einstakra átaksverkefna
- Efla móttökuferli, upplýsingagjöf og tengslamyndun fyrir nýja íbúa frá fyrsta degi
- Vinna með sérfræðingum, félagasamtökum og notendum þjónustunnar við þróun lausna
- Tryggja að inngilding sé ekki afmörkuð við einn málaflokk heldur hluti af allri starfsemi bæjarins
- Bjóða áfram upp á íslenskunámskeið fyrir starfsfólk bæjarins
Eldra fólk á að geta notið lífsins í Garðabæ með virðingu, aðgengi, félagslegum tengslum og stuðningi við sjálfstætt líf.
Við viljum
- Aðgengilegar og gagnsæjar upplýsingar um réttindi eldra fólks í Garðabæ
- Aðgengi að ráðgjöf og þjálfun í tæknilæsi fyrir eldra fólk
- Fjölbreytt félagsstarf til að sporna gegn einangrun og einmanaleika
- Félagsaðstöðu fyrir eldra fólk í öllum hlutum bæjarins
- Samþætta félagslega heimaþjónustu á vegum bæjarins og heimahjúkrun á vegum heilsugæslunnar
- Veita eldra fólki góðan stuðning til að búa lengur í eigin húsnæði, kjósi það svo
- Bæta aðgengi við allar opinberar byggingar, almenningssamgöngur, stíga og útivistarsvæði
- Forðast að aðgreina fólk í hverfi eftir aldri eða stöðu
Við ætlum að
- Bæta upplýsingagjöf og ráðgjöf um réttindi eldra fólks, þjónustu og tæknilausnir
- Styrkja félagsstarf og nærþjónustu um allan bæ í stað þess að einblína á fáa staði
- Vinna með heilbrigðisþjónustu, félagasamtökum og íbúum sjálfum að raunhæfum lausnum í þágu eldra fólks í bænum
- Vinna að því að setja upp félagsaðstöðu fyrir eldra fólk í Urriðaholti
- Horfa til aðgengis og sjálfstæðis sem leiðarljósa í allri stefnumótun um eldra fólk
- Koma á frístundastyrk fyrir eldri borgara og öryrkja
Fatlað fólk á að geta lifað sjálfstæðu lífi í Garðabæ með viðeigandi þjónustu, vali um búsetu og fullt aðgengi að samfélaginu.
Við viljum
- Veita fötluðum Garðbæingum raunverulegt val um búsetuform og staðsetningu
- Útrýma biðlistum og fjölga aðgengilegu húsnæði
- Að þjónusta við fatlað fólk sé í fremstu röð í Garðabæ
- Bæta aðgengi að opinberum byggingum, samgöngum, stígum og útivistarsvæðum
- Auka gagnsæi og upplýsingagjöf um þjónustu við fötluð börn og fullorðna
- Vinna markvisst að afstofnanavæðingu og rétti fatlað fólks til sjálfstæðs lífs
- Að mikilvægar upplýsingar frá bænum séu aðgengilegar á auðlesnu máli
- Skapa atvinnutækifæri fyrir fatlað fólk með hlutastörfum og sveigjanlegum vinnutíma
- Að fatlað fólk sem á þarf að halda geti sótt sk. vinnu- og virkniúrræði í bænum
- Auka sýnileika fatlaðs fólks í Garðabæ, t.d. í tengslum við menningarviðburði
Við ætlum að
- Setja réttindamiðaða nálgun og aðgengi fatlaðs fólks í forgang við þjónustu, skipulag og upplýsingagjöf
- Greina biðlista, þjónustubil og húsnæðisþörf markvisst og bregðast við þeim
- Bæta gagnsæi og opinbera upplýsingagjöf um þjónustuferli og réttindi
- Nýta sveitarfélagið sjálft sem fyrirmyndar vinnustað þar sem við á
- Setja á fót vinnu- og virkni úrræði fyrir fatlað fólk í Garðabæ
Garðabær á að vera samfélag þar sem fólk af ólíkum uppruna, sem talar ólík tungumál og hefur mismunandi reynslu, fær tækifæri til að taka virkan þátt í samfélaginu og finna að það eigi hér heima. Fjölbreytileiki er styrkur og bæjarfélagið á að vinna markvisst að því að brjóta niður hindranir sem tengjast tungumáli, upplýsingaaðgengi, kerfisflækju og félagslegri einangrun.
Við viljum
- Að upplýsingar frá bænum séu á skýru máli og eftir því sem við á, á fleiri tungumálum
- Markvissa móttöku, leiðsögn og tengingu við þjónustu fyrir nýja íbúa strax frá upphafi
- Betra aðgengi foreldra með fjölbreyttan tungumála- og menningarbakgrunn að upplýsingum og samskiptum við skóla, leikskóla og frístundastarf
- Vinna markvisst gegn félagslegri einangrun og skapa fleiri tækifæri fyrir íbúa til að mynda tengsl í nærumhverfi sínu
- Þekkingu og verkfæri fyrir starfsfólk bæjarins til að mæta fjölbreyttum þörfum íbúa af virðingu og fagmennsku
- Samráð við íbúa sem endurspeglar betur fjölbreytileika samfélagsins, þar á meðal raddir fólks sem ekki hefur íslensku sem fyrsta tungumál
- Að börn og ungmenni af fjölbreyttum bakgrunni upplifi öryggi, virðingu og þátttöku í skóla- og tómstundastarfi
- Betri stuðning Garðabæjar við samfélagsverkefni sem efla tengsl, samtal og þátttöku milli íbúa með ólíkan bakgrunn
Við ætlum að
- Þróa skýra móttökuáætlun fyrir nýja íbúa með hagnýtum upplýsingum um þjónustu, skóla, frístundir og réttindi
- Forgangsraða því að lykilupplýsingar frá bænum séu bæði skýrar og aðgengilegar, meðal annars með einfaldara máli og þýðingum þar sem þörf er á
- Efla samstarf skóla, frístundastarfs, félagsþjónustu og annarra þjónustueininga svo fjölskyldur fái samfelldari stuðning
- Bjóða starfsfólki reglubundna fræðslu um fjölmenningarnæmni, inngildandi samskipti og tungumálavitund
- Skapa fleiri vettvanga þar sem fólk getur hist, kynnst og tekið þátt, til dæmis fjölskylduviðburði, tungumálakaffi, tengslaverkefni og opið samráð
- Leita markvisst eftir sjónarmiðum íbúa með fjölbreyttan bakgrunn við stefnumótun og þjónustuþróun, í stað þess að gera ráð fyrir þörfum þeirra án samtals
Börn og ungmenni eru framtíðin og það er hlutverk hvers sveitarfélags að búa börnum umhverfi þar sem þau geta blómstrað á eigin forsendum, án tillits til efnahags foreldra eða stöðu að öðru leyti. Garðabær á að vera barnvænt samfélag þar sem er eftirsóknarvert fyrir fólk að búa og ala upp börn sín.
Við viljum
- Lækka með markvissum og ábyrgum hætti álögur á barnafjölskyldur.
- Veita systkinaafslátt í íþrótta-, tómstunda- og æskulýðsstarfi í gegnum hvatapeningakerfið.
- Styðja við félagasamtök sem standa að íþrótta- og æskulýðsstarfi barna og ungmenna með samningum og uppbyggingu aðstöðu.
- Tryggja markvissa innleiðingu barnasáttmála Sameinuðu þjóðanna í gegnum verkefnið Barnvæn sveitarfélög.
- Efla enn frekar þátttöku barna og ungmenna við ákvarðanatöku innan sveitarfélagsins.
- Leggja áherslu á að tryggja áframhaldandi innleiðingu og eftirfylgni með samþættingu þjónustu í þágu farsældar barna.
- Huga sérstaklega að umferðaröryggi barna.
- Bjóða upp á hafragraut á morgnana í grunnskólum bæjarins, fjölskyldum að kostnaðarlausu.
- Létta undir með fjölskyldum ungra barna, t.d. yfir sumartímann og í daglegu lífi.
Við ætlum að
- Innleiða sumarfrístund á vegum frístundaheimila skólanna til viðbótar við þau námskeið sem eru í boði á vegum félaganna í bænum.
- Hafa bókasafn Garðabæjar opið á sunnudögum.
- Lengja opnunartíma sundlauganna í Garðabæ um helgar.
- Hverfa frá útboði skólamáltíða: Matur verði eldaður í hverjum skóla/leikskóla í staðinn.
- Bjóða frían hafragraut á morgnana í skólum.
- Kynna af krafti þá afslætti sem bjóðast tekjulægri barnafjölskyldum.
- Koma á systkinaafslætti í skipulögðu íþrótta-, tómstunda- og æskulýðsstarfi í gegnum hvatapeningakerfið.
- Hækka hvatapeninga í 75 þúsund og láta þá fylgja verðlagsþróun ár frá ári.
Samfélag sem eflir
Rekstur grunn- og leikskóla er eitt mikilvægasta verkefni hvers sveitarfélags. Garðabær hefur skapað sér orðstír sem bæjarfélag öflugra grunnskóla og leikskóla. Halda þarf áfram á þeirri vegferð, en ekki síst verður að standa vörð um og styðja duglega við þróunarstarf í skólum, huga að vellíðan starfsfólks og gæta þess að húsnæðiskostur sé ásættanlegur, bæði fyrir börn og starfsfólk. Þannig búum við til framúrskarandi umhverfi til náms og leiks fyrir börnin okkar.
Við viljum
- Gæta að fyrirbyggjandi aðgerðum til þess að koma í veg fyrir myglu- og rakaskemmdir í skólahúsnæði.
- Stefna að gjaldfrjálsum leikskólum.
- Standa vörð um þróunarsjóði leik- og grunnskóla Garðabæjar og efla þá enn frekar.
- Halda í öflugt starfsfólk með hvetjandi vinnuumhverfi sem einkennist af trausti og framúrskarandi faglegu starfi.
- Leggja áherslu á að kenna börnum gagnrýna hugsun og samkennd samhliða kjarnagreinum.
- Gera ráð fyrir uppbyggingu leik- og grunnskóla í tæka tíð fyrir fólksfjölgun vegna nýrra hverfa.
- Byggja upp þekkingu innan bæjarins á kennslu íslensku sem annars tungumáls í grunnskólum.
- Efla kynfræðslu og kynjafræðikennslu á öllum skólastigum.
- Að skólar og leikskólar í Garðabæ státi af áberandi háu hlutfalli fagmenntaðs starfsfólks.
Við ætlum að
- Lækka leikskólagjöld í öruggum skrefum með það að markmiði að leikskólar verði gjaldfrjálsir.
- Endurmeta Garðabæjarmódelið í leikskólamálum og vinna það aftur að þjónustu sem hentar fólki á vinnumarkaði
- Byggja upp sérþekkingu innan bæjarins á kennslu íslensku sem annars tungumáls með fræðslu, ráðgjöf og faglegum stuðningi við starfsfólk
- Bæta starfsumhverfi í leik- og grunnskólum með skýrri mannauðsstefnu, góðri handleiðslu, auknum stuðningi við starfsfólk og áherslu á að halda í reynslumikið fólk.
- Koma á reglubundnu eftirliti og viðhaldsáætlun fyrir skólahúsnæði til að fyrirbyggja myglu- og rakaskemmdir.
- Eiga samtal við skólasamfélagið í Garðabæ um uppbyggingu á samræmdri kennslu í kynjafræði og kynfræðslu á öllum skólastigum
- Styðja skóla við að samþætta gagnrýna hugsun, samkenndarþjálfun og lýðræðislega þátttöku inn í daglegt skólastarf samhliða sterkri kennslu í kjarnagreinum.
Skipulagt íþrótta-, tómstunda- og æskulýðsstarf er ein mikilvægasta forvörnin og getur skipt sköpum í velferð barna og ungmenna, auk þess að hafa mikið menningarlegt mikilvægi fyrir samfélagið okkar. Við horfum sérstaklega til lýðheilsu og félagslegra sjónarmiða í málaflokknum.
Við viljum
- Styðja við félagasamtök sem standa að íþrótta- og æskulýðsstarfi með samningum og uppbyggingu aðstöðu.
- Vinna alla stefnumótun í íþrótta-, tómstunda- og æskulýðsmálum til lengri tíma og taka mið af auknu álagi á félög bæjarins í ört stækkandi bæ við ákvörðun fjárframlaga.
- Efla Ungmennahúsið Torgið og bæta við aðstöðu þess.
- Setja aukna áherslu á fjölbreytt íþrótta- og æskulýðsstarf, svo sem flest börn geti fundið tómstundir við hæfi.
- Ýta undir að íþróttafélögin bjóði upp á íþróttastarf þar sem pláss er fyrir alla sem hafa áhuga, óháð getustigi.
- Gætt sé að jafnræði milli íþróttafélaga og annara félaga bæjarins er varðar framlög, sérstaklega þeirra sem bjóða upp á skipulagt starf fyrir börn og ungmenni.
- Aðgengi að skipulögðu félagsstarfi sé tryggt á milli hverfa.
- Vinna markvisst að því að auka þátttöku þeirra barna og ungmenna sem þrífast gjarnan síður í skipulögðu starfi (fötluð, hinsegin, með erlendan bakgrunn)
Við ætlum að
- Setja á fót þróunarsjóð íþrótta-, tómstunda- og æskulýðsmála, með áherslu á inngildingu og að halda ungmennum lengur í skipulögðu starfi.
- Tryggja Karatefélagi Garðabæjar aðstöðu í Miðgarði.
- Semja við Golfklúbbinn Odd um uppbyggingu vetraraðstöðu við Urriðavöll.
- Veita systkinaafslátt í íþrótta-, tómstunda- og æskulýðsstarfi í gegnum hvatapeningakerfið og hækka hvatapeninga í 75 þúsund kr.
- Bjóða félagasamtökum með samninga við bæinn að njóta sömu mannréttinda- og jafnréttisfræðslu og starfsfólki Garðabæjar býðst.
- Vinna markvisst að því að stytta biðlista í Tónlistarskóla Garðabæjar.
- Færa knattspyrnu, handknattleik og körfuknattleik hjá Stjörnunni á Miðgarðssvæðið samhliða fyrirhugaðri uppbyggingu íþróttamannvirkja á svæðinu.
- Setja upp stúku við knattspyrnusvæðið á Álftanesi
- Skipuleggja tvo heila gervigrasvelli á Álftanesi, annan upp við íþróttahúsið og hinn á núverandi vallarstæði
- Skipuleggja svæði á Álftanesi með möguleika á hálfu knatthúsi og skilja eftir svæði fyrir heilsutengda starfsemi og/eða stækkunarmöguleika fyrir íþróttastarf á nesinu
Á undanförnum árum hefur menningarlíf eflst mikið í Garðabæ. Garðabæjarlistinn vill halda þeirri þróun áfram, enda hefur öflugt menningarlíf mikil og jákvæð áhrif á lífsgæði bæjarbúa og tekur þátt í að skapa fjölbreyttan og skemmtilegan bæjarbrag.
Við viljum
- Reisa öflugt menningarhús – menningarmiðju – við Garðatorg, með Bókasafn Garðabæjar sem kjarnastarfsemi og skemmtilegu svæði fyrir fjölskyldur.
- Gera Garðatorg grænna. Leita verður fjölbreyttra leiða til þess að gera torgið vistlegra svo það verði áhugaverðari og skemmtilegri áfanga- og samkomustaður, en einnig að tengja hluta þess betur saman.
- Styðja við félagasamtök í öllum hverfum bæjarins sem vinna að menningarmálum og hvetja sérstaklega til opins viðburðahalds.
- Halda viðburði á vegum menningar- og safnanefndar Garðabæjar einnig á Álftanesi og í Urriðaholti.
- Halda fleiri pop-up markaði og listasýningar á Garðatorgi.
- Hafa list sýnilegri í almannarými Garðabæjar.
Við ætlum að
- Hafa bókasafn Garðabæjar opið á sunnudögum og auka aftur við opnunartíma á Álftanessafni.
- Skipuleggja og hanna menningarmiðju og setja á framkvæmdaáætlun.
- Auka fjárframlög til Bókasafns Garðabæjar svo það geti mætt kröfum nútímans til almenningssafna enn betur.
- Setja á fót samkeppni um nýtt útilistaverk í Garðabæ.
Loftslagsmál og umhverfisvernd varða okkur öll og lífsgæði okkar til frambúðar. Mikilvægt er að sveitarfélög eins og Garðabær gefi ekkert eftir í umhverfismálum. Skýr, mælanleg, tímasett markmið sem og raunhæfar, framsæknar og fjármagnaðar aðgerðir eru forsenda árangurs Garðabæjar. Garðabæjarlistinn vill standa vörð um náttúruna, bæði á heimsvísu og í Garðabæ.
Við viljum
- Gera Garðabær að leiðandi sveitarfélagi í loftslagsmálum og setja enn háleitari markmið en nú eru, bæði um losun sveitarfélagsins á kolefni og svo á þeim sviðum þar sem hægt er að hafa áhrif á losun íbúa.
- Uppfæra stefnumótun, markmiðasetningu og aðgerðir reglulega. Stefna byggist á og mótist af vaxandi þekkingu, rannsóknum og vöktun hverju sinni.
- Taka alltaf mið af áhrifum á umhverfið í tengslum við skipulags- og samgöngumál.
- Ráðast í grænar fjárfestingar og styðja við loftslagsvæna nýsköpun.
- Draga úr myndun úrgangs, minnka sóun, auka endurnotkun og endurvinnslu. Líta þarf á úrgang sem auðlind sem fer hring eftir hring í framleiðslu og notkun.
- Bæta vatnsvernd þar sem þess er þörf og stuðla að náttúrulegu ástandi vistkerfa ferskvatns og strandsjávar.
- Leggja ríka áherslu á vernd og sérstöðu náttúru Garðabæjar, til lands og sjávar, og líffræðilegrar og jarðfræðilegrar fjölbreytni hennar.
Við ætlum að
- Uppfæra loftslagsstefnu Garðabæjar reglulega og setja skýrari og metnaðarfyllri markmið um samdrátt í losun
- Efla fræðslu og hvatningu til íbúa og fyrirtækja um sjálfbærari neyslu og betri meðferð auðlinda
- Halda áfram að styrkja vernd líffræðilegrar og jarðfræðilegrar fjölbreytni í landi bæjarins
- Efla eftirlit og upplýsingagjöf til íbúa er varðar mengun í lækjum og við sjávarsíðuna
Við viljum
- Gera lýðheilsu og lífsgæði að lykiláherslum hjá sveitarfélaginu.
- Leggja áherslu á forvarnir
- Efla og virkja færni innan sveitarfélagsins sem getur stuðlað að bættri heilsu og vellíðan þvert á aldurshópa.
- Stuðla að umhverfi sem eykur getu fólks til þess að hlúa að andlegri líðan.
- Líta á félagsauð sem grundvöll hamingju íbúa. Mikilvægt er að allt fólk finni sitt samfélag, því það er lýðheilsumál að tilheyra.
Við ætlum að
- Lengja opnunartíma sundlauga um helgar og bæta þjónustu sundlauga og íþróttamiðstöðva með betri mönnun
- Þjálfa starfsfólk í geðheilbrigðismálum með það að markmiði að ýta undir snemmtæka íhlutun
- Bjóða upp á námskeið fyrir íbúa um almenna heilsu, uppeldi barna og líðan
- Draga úr einmanaleika með því að efla félagsstarf og svokölluð ‘þriðju rými’ (sundlaugar, íþróttamiðstöðvar, bókasafn, félagsmiðstöðvar) í bænum
- Bæta bekkjum við gönguleiðir til að auka aðgengi fólks sem á erfitt með gang
