Þorbjörg Þorvaldsdóttir skrifar:
Garðabæjarlistinn hlaut 20.9% atkvæða í síðustu kosningum og tvo bæjarfulltrúa. Við höfum tekið það traust sem okkur var sýnt fyrir fjórum árum alvarlega allt kjörtímabilið. Sem stærsti flokkurinn í minnihluta höfum við látið til okkar taka í bæjarstjórn og veitt Sjálfstæðisflokknum öflugt aðhald. Við höfum ýtt við breytingum á ótal málum og eftir okkur liggur fjöldi bókana og tillagna.
Garðabæjarlistinn hefur barist fyrir hækkun hvatapeninga fyrir hverja einustu fjárhagsáætlun, alltaf talað fyrir lækkun kostnaðar fyrir barnafjölskyldur, fyrir því að Garðabær axli ábyrgð sína er varðar uppbyggingu félagslegs húsnæðis, fyrir auknum almenningssamgöngum og fjölbreyttum ferðamátum og húsnæðiskostum. Við lögðum til ávaxtastund í grunnskólum og seinkun skólabyrjunar í unglingadeild. Við lögðum til að starfsfólk Garðabæjar fengi frítt í sund. Við stóðum vaktina og þrýstum á um fullkomið gagnsæi og festu þegar mygla fannst í nær öllum skólum Garðabæjar í upphafi kjörtímabils. Nýsamþykkt hjólreiðastefna Garðabæjar byggir á okkar tillögu. Fyrirhuguð lækkun umferðarhraða víða í bænum byggir á okkar tillögu. Þá hafa mál líkt og breytingarnar á starfsumhverfi leikskóla og skipulag í kringum fyrirhugaðan íbúðakjarna fyrir fatlað fólk í Hnoðraholti tekið jákvæðum breytingum í meðförum nefnda vegna okkar íhlutunar. Við höfum svo að sjálfsögðu tekið þátt í sameiginlegum tillögum og bókunum bæjarstjórnar og tekið undir þær tillögur annarra flokka sem okkur þykja til þess fallnar að bæta bæjarfélagið okkar. Garðabæjarlistinn hefur sinnt hlutverki sínu af ábyrgð og sanngirni.
Nú líður aftur að kosningum og Garðabæjarlistinn hefur sett saman ítarlega málefnaskrá sem við munum kynna og ræða við fólkið í bænum á næstu vikum. Þau mál sem við viljum vekja sérstaka áherslu á eru eftirfarandi:
Við ætlum að gera stórátak í uppbyggingu og viðhaldi gangstétta og göngustíga í eldri hverfum Garðabæjar.
Það er mikilvægt að við komumst öll með öruggum hætti um bæinn okkar. Víða í Garðabæ eru gangstéttar úr sér gengnar, of mjóar, þær hætta skyndilega á furðulegum stöðum eða vantar hreinlega – með tilheyrandi áhrifum á aðgengi og öryggi fólks sem gengur um bæinn. Úr þessu ætlum við bæta með markvissum hætti á næsta kjörtímabili.
Við ætlum að hafa bókasafn Garðabæjar opið á sunnudögum og lengja opnunartíma sundlauganna í Ásgarði og á Álftanesi um helgar.
Almenningsrými þar sem fólk kemur saman utan heimilis, skóla eða vinnu eru afar mikilvæg fyrir hvert samfélag. Bókasafnið og sundlaugarnar stuðla að betri andlegri, félagslegri og líkamlegri heilsu fólks á öllum aldri og vinna gegn einmanaleika. Garðabæjarlistinn ætlar að auka þjónustu við íbúa og gera þessi rými aðgengilegri.
Við ætlum að hverfa frá útboði skólamáltíða.
Suma þætti í rekstri bæjarfélags er eðlilegt að bjóða út. Maturinn sem börnin okkar borða á hverjum degi er ekki einn þeirra. Garðabæjarlistinn vill að hollur og ferskur matur verði eldaður í hverjum skóla og leikskóla, þannig að bærinn hafi betri stjórn á gæðum matarins.
Við ætlum að hækka hvatapeninga í 75 þúsund kr. og veita systkinaafslátt í íþrótta-, tómstunda- og æskulýðsstarfi í gegnum hvatapeningakerfið.
Of mörg heimili í Garðabæ eru að sligast undan kostnaði vegna tómstunda barna. Á sama tíma ver bærinn milljörðum í að byggja upp og reka aðstöðu fyrir barna- og ungmennastarf. Öll börn í Garðabæ eiga að geta notið þessara gæða – óháð efnahag og stöðu foreldra. Garðabæjarlistinn vill nýta hvatapeningakerfið til þess að styðja við barnmargar fjölskyldur og hækka upphæðina myndarlega til þess að styðja við þátttöku barna í skipulögðu starfi, enda er slík þátttaka ein grunnforsenda íslenska forvarnarmódelsins.
Við ætlum að setja á fót þróunarsjóð íþrótta-, tómstunda- og æskulýðsmála, með áherslu á inngildingu og að halda ungmennum lengur í skipulögðu starfi.
Börn hætta gjarnan í skipulögðu íþrótta-, tómstunda- og æskulýðsstarfi þegar líður á unglingsárin. Sumir hópar barna hafa svo takmarkað aðgengi að skipulögðu starfi eða upplifa sig ekki velkomin, t.d. fötluð börn, hinsegin börn og börn innflytjenda. Gegn þessu viljum við vinna í samstarfi við félögin í bænum með því að setja á fót þróunarsjóð sem þau geta sótt í árlega.
Við ætlum að reisa öflugt menningarhús – menningarmiðju – við eða nálægt Garðatorgi, með Bókasafn Garðabæjar sem kjarnastarfsemi.
Öflugt menningarlíf er einkenni sterks samfélags. Það er löngu kominn tími á að menningu í Garðabæ sé lyft á hærra stig með aðgengilegu og áberandi menningarhúsi, þar sem kynslóðir Garðbæinga geta komið saman og notið fjölbreyttrar menningar. Bókasafn Garðabæjar er tilvalið sem kjarnastarfsemi í húsið, enda þarf það nútímalegt húsnæði svo það geti fylgt þróun almenningsbókasafna á heimsvísu.
Við ætlum að skipuleggja blandaða byggð í Iðnbúð, Smiðsbúð og Gilsbúð.
Iðnaðarhverfið í búðunum er barn síns tíma. Þar er kominn tími til þess að skipuleggja aðlaðandi hverfi, þar sem litlar íbúðir sem henta þörfum bæði yngra og eldra fólks geta risið – með fyrirtækjum og verslunum á neðstu hæðum.
Við ætlum að gera malbikaðan útivistarstíg í kringum Arnarnesið.
Allir Garðbæingar eiga að geta notið strandlengjunnar við Arnarnes. Það er löngu kominn tími til þess að gera þar útivistarstíg sem getur þjónað öllum bæjarbúum.
Málefnaskrá Garðabæjarlistans fyrir kosningarnar í vor snýst í heild sinni um samfélag sem eflir, styður og einfaldlega virkar betur. Við erum óháður flokkur með skýrt erindi: Við viljum byggja upp Garðabæ þar sem allt fólk getur fundið sína fjöl, þar sem við getum öll tilheyrt og blómstrað. Það er löngu tímabært að sá hluti bæjarbúa sem er ekki í Sjálfstæðisflokknum haldi á dagskrárvaldinu hér í bænum. Við höfum sýnt það með okkar framgöngu á undanförnum árum að Garðabæjarlistinn er tilbúinn í verkefnið. Við óskum eftir ykkar stuðningi 16. maí og hlökkum til að bjóða ykkur velkomin í betri Garðabæ – fyrir okkur öll.
Þorbjörg Þorvaldsdóttir,
bæjarfulltrúi og oddviti Garðabæjarlistans
Greinin birtist fyrst í Garðapóstinum 15. apríl sl.
